A re bopeng setšhaba se se hlokomelago mmogo
KGORO YA TŠWETŠOPELE YA LEAGO
HIV/AIDS e phatlalala ka lebelo le legolo mo nageng ye. Ka fao re hloka gore re dirišane mmogo gore re e thibele go phatlalala go ya pele. Re hloka gape gore re hlokomele le go thekga bao ba amegilego gape ba tshwaeditšwego. Phamfolete ye maikemišetšo a yona ke go go thuša go hwetša tsebo malebana le ditirelo tšeo di lego gona le ka moo o ka ithušago ka gona le ba bangwe mo twantšhong ye ya HIV/AIDS
Ka moo o ka tšeago karolo ka gona mo thibelong, tlhokomelo le thekgo
O seke wa kgethologanya
Ithute o be o rute le ba lapa la gago ka ga HIV/AIDS
Boledišana le bagwera, meloko, badirišanikawena, phuthego ya kereke, bana ba gago le ditho tša setšhaba ka ga HIV/AIDS
Tseba maemo a gago ka ga HIV/AIDS, ithaope go tsenela keletšo ya HIV/AIDS le go dira diteko mo lefelong la kgauswi le wena la tša maphelo.
Tshepagala, se robalane goba o diriše dikgotlopo.
Kgatha tema mo mererong ya setšhaba yeo e nyalelanago le HIV/AIDS, mohlala, lenaneo la tlhokomelo le thekgo yeo e theilwego godimo ga legae/setšhaba, gape o iphe nako ya dilo tše.
Hlokomela, o thekge batho, kudu bana bao ba tshwaeditšwego gape ba amago ke HIV/AIDS gomme o ba thuše gore ba kgone go fihlelela ditirelo tše.
Bega ka ga ditšhuana le bana ba ba lego kotsing bao o ba tsebago go Dithulaganyo tša Setšhaba (CBOs), tšeo e se go tša Mmušo (NGOs), Dithulaganyo tša Tumelo (FBOs), dikantoro tša selegae le tša profense tša tšwetšopele ya leago, bj.bj
Tšea karolo mo go kaonafatšeng le go tšwetšeng pele leago la setšhaba sa geno.
Tsenela mananeo a sethaka a thuto go laola phatlalatšo ya HIV/AIDS setšhabeng sa geno.
Go ithuta le go ruta ba lapa la gago, eya kliniking ya geno ya kgauswi, CBO, FBO, NPO tšeo di tšweletšago ditirelo tša tšwetšopele ya leago.
Ka moo o ka phelago gabotse ka gona o na le HIV/AIDS
Eba le tshepo ya bophelo gomme o itshepe.
Hlokomela bophelo bja gago- netefatša gore o ja dijo tša go ba le phepo, itšhidulle, khutša gomme o nwe dihlare tša gago ka tshwanelo.
Nyaka thušo ya kalafo gore o hwetše maele le kalafo ka ga malwetši kliniking ya geno ya kgauswi.
Boledišana le motho yo o mo tshepago. Nyaka thušo ya botsebi- nyaka maele go batsebi
O seke wa kwa o ka re o gapeletšega gore o kitimele go botša batho le go phela gabotse ka bolwetši bjo.
Mogatša/molekane wa gago o swanetše a tsebe ka ga maemo a gago malebana le HIV.
Tsenela sehlopha sa thekgo setšhabeng sa geno, mošomong goba o thome sehlopha seo ge e ba ga se gona.
Ge o ekwa okare o befetšwe, ga o hlokomelwe, o a šia – bolela ka ga maikutlo a gago, kgopela thušo go batsebi le yo mongwe wa leloko gore o hwetše thekgo.
E ba le thobalano ye e šireletšegilego
Dithušo tša batho bao ba palelwago di gona ge e ba ga o kgone go šoma ka mabaka a bolwetši bjo bo telele.
Ka moo o ka itokišago ka gona go bolela le bana ba gago ge o na le HI
Thoma ka go bolela
Botša bana ba gago ka ga maemo/bolwetši bja gago
Ngwala pukwana/lepokisana la dikgopotšo (tsenya diswantšho, direto, dikanegelo, dikgopotšo, bj.bj.)
Godimo ga fao, anega dikanegelo ka ga bophelo bja gago le lapa la gago
Hlohleletša bana ba gago gore ba go botšiše dipotšišo
Boledišana le motho yo o mo tshepago ge e ba o tshwenyega ka gore wena goba ngwana/bana ba gago ga le kgone go phela ka taba ye kudu ge e ba le lebagane le go šišinywa goba go kgethollwa.
Gore o hwetše thekgo ya gago ye e lebanego le monagano, ikopanye le modirelaleago goba moeletši wa kgauswi mo nageng ya geno.
Tlhokomelo ye nngwe
Beakanya tlhokomelo ye nngwe ya bana ba gago – se se ra gore- ke mang a tlogo hlokomela bana ba gago mo nakong ya ge o gateletše ke bolwetši goba ge o ka hlokofala.
Netefatša gore bana ba gago ba tlwaela batswadi ba ba tlogo ba hlokomela gape ba kgona go ikopanya le bona.
Kgetha ka šedi o ela tlhoko dinyakwa le diputšwetšo tša bana ba gago.
Mo mabakeng ao e lego gore bana ba ka se šale le ba leloko goba batswadi ba tlametlo, ba swanetše ba bewe mo lefelong la tulo la tlhokomelo.
Mo mabakeng a mangwe bana ba gapeletšega go šala ka magaeng a bona ntle le hlapetšo ya botswadi. Magae ao a bitšwa magae ao a bušago ke bana
Magae ao a bušago ke bana
Ge e ba o dula ka legaeng leo le bušago ke ngwana goba o tseba legae leo le bušago ke ngwana, o swanetše o ikopanye le ditirelo tša kgauswi le ga geno tša tšwetšopele ya leago gore ba hwetše tshedimošo yeo ba ka kgonago go fihlela ditirelo tša leago, mohlala, thušo ya kgodišo ya ngwana, thušo ya tlhokomelo ya tlametlo le thušo ya ka pela ya dijo.
Ditšhelete
Kgetha mohlokomedi
Ngwala Wili- bohlatse bjoo bo laetšago ditakatšo tša motho ka morago ga lehu la gagwe.
Wili e netefatša gore thoto, naga, tšhelete di fiwa batho ba maleba
Dira bohlatse bja gore ke mang a swanetšego gore a šale le bana, gomme ge go se na molekane, kgetha bahlokomedi.
Gore e be ya mmakgonthe, Wili e swanetšwe gore e ngwalwe ka enke ya sa ruri goba e tlanywe, e saenwe ke wena gape e laetše gore e ngwadilwe ka nako yeo e lego gore motho yo o phetše gabotse monaganong ebile ga a gapeletšwa ke motho yo mongwe go dira seo.
Ditirelo tša Tlhokomelo le Thekgo
Ditirelo tše di latelago di filwe ke ditirelo tša tšwetšopele ya leago le dithulaganyo mo ditšhabeng:
Taetšo ya malapa le bana bao ba hlokago thušo
Go fana ka dijo, diaparo, bodulo, phološo ya leago le taetšo ya ditirelo tša maphelo
Tšhireletšo ya bana kgahlanong le tlaišo le tlhokomologo
Ditirelo tša tlhokomelo ya bana mo mosegareng
Tlhokomelo ye nngwe ya bana e ka ba kaone ge e le ka gare ga setšhaba, mohlala tlhokomelo ya tlametlo
Tshedimošo ya phihlelelo ye e oketšegilego ya dithušo le ditirelo tše dingwe tša thekgo ka tšhelete.
Dikgopelo tša dithušo tša leago bjalo ka dithušo tša tlhokomelo ya tlametlo, dithušo tša go hloka tšhitišo tša bagolo bao ba lwalago nako le nako, dithušo tša bana bao ba phelago ka thekgo le tlhokomelo
Tshepedišo ya setšhaba
Go hlahla bahlahli mo setšhabeng sa tšona.
Thuto ya setšhaba malebana le ditlamorago le titeo tša HIV/AIDS go akaretša ka moo go ka fokotšwago go šišinywa le kgethologanyo.
Diprojeke tša go fokotša bodiidi
Ditirelo tša Tlhokomelo le Thekgo go ditšhuana le bana bao ba lego kotsing
Tlhokomelo ya tlametlo
Tlhokomelo ya tlametlo ke tlhokomelo ya ngwana wa motswadi wo mongwe. Ngwana e ka ba moloko goba motho fela go wena. Ngwana o bewa ka fase ga tlhokomelo ya gago ke Kgoro ya Tlhokomelo ya Bana. Modirelaleago o hloka gore a ngwalele Mokhomišinare wa Kagišo ya Bana pego. Thušo ya tlhokomelo ya tlametlo e fiwa wena gore o kgone go hlokomela ngwana.
Go tšea maikarabelo a ngwana
Go tšea maikarabelo a ngwana ke go dira gore ngwana yoo e sego wa gago ka madi e be wa gago. Ngwana yo mongwe le yo mongwe yo a lego ka tlase ga mengwaga ye 18 a ka tšewa ke motswadi yo mongwe gore e be ngwana wa gagwe. Ngwana o tšewa bjalo ka ngwana wa gago go ya ka Molawana wa Tlhokomelo ya Bana gape modirelaleago o swanetše a ngwalele Mokhomišinare wa Kagišo ya Bana pego.
Tlhokomelo ya Bodulo
Tlhokomelo ya bodulo ke ya bana ka legaeng la bana. Legae la bana ke lefelo leo le ka kgonago go thuša bana ba go feta selela ka marobalo gape le swanetše go ba le ngwadišitše le Kgoro ya Tšwetšopele ya Leago.
Mehuta ya dithušo tša ditšhelete tšeo di lego gona tša go hlokomela bana
Thušo ya Thekgo ya Ngwana
Thušo ya thekgo ya ngwana e fiwa mohlokomedi, yoo e lego motho yoo a ka bego a tswalana goba a sa tswalane le ngwana, yoo a tšeago maikarabelo a motheo a fihlela tlhokomelo/dinyakwa tša ngwana tša tšatši ka tšatši. Bahlokomedi ga ba swanelwa go lefelwa go hlokomela ngwana. Thušo ye e fiwa go fihla ka bana ba bontši bja selela ba mengwaga ya magareng ga 0 le 14. Thušo ya Thekgo ya Ngwana e ka oketšwa go fihla ka mengwaga ye meraro go akaretša bana ba mengwaga ya ka fase ga 14 go ya ka tsela ye: go tloga ka 1 Aporele 2003, bana ba ka fase ga mengwaga ye 9 ba ka hwetša thušo, go tloga ka 1 Aporele 2004, bana ba ka fase ga mengwaga ye11 ba tla dumelelwa go hwetša thušo, gomme go tloga ka 1 Aporele 2005, bana ba ka fase ga mengwaga ye 14 ba tla dumelelwa go hwetša thušo.
Thušo ya Go phela ka Tlhokomelo ya batho bangwe
Thušo ya go phela ka tlhokomelo ya batho ba bangwe e ka fiwa ngwana yo a lego magareng ga mengwaga ye 1 le 18 yoo a hlokago e bile a amogela tlhokomelo ya sa ruri ya legae ka mabaka a bogole bja gagwe bja monagano goba mmele. Ditseno tše di kopantšwego tša ngwaga ka moka tša mokgopedi le molekane wa gagwe ka morago ga diphokotšo tše di dumeletšwego ga tša swanela go feta R48 000 gape ditseno tša tlhokomelo ya ngwana ga tša swanela go feta palomoka ya ditseno tša ngwaga gabedi tša thušo ya go phela ka tlhokomelo ya batho ba bangwe. Ngwana le batswadi ba gagwe ba swanetše e be badudi ba Afrika Borwa.
Thušo ya Bogole
Mokgopedi o swanetše a:
be Modudi wa Afrika Borwa;
be modudi wa Afrika Borwa ka nako ya kgopelo;
be magareng ga mengwaga ye 18 le 59 ge e ba ke mosadi goba magareng ga mengwaga ye 18 le 64 ge e ba ke monna;
romele pego ya kalafo/tshekatsheko ye e kgonthišišago go se kgone/bogole; gape mogatša wa gagwe o swanetše a fihlelele dinyakwa tša teko ya tšhelete;
be e le gore ga a phedišwe goba ga a hlokomelwe ke Lefelo la Mmušo;
be e le gore ga a amogele thušo ye nngwe ya leago ye e lego ka fase ga leina la gagwe.
Romele pukwana ya boitsebišo yeo e nago le dinomoro tše lesometharo.
Thušo ya Ngwana wa Tlametlo
Thušo ya ngwana wa tlametlo e lefelwa go ya ka ngwana yoo a hwetšwago a na le hlokego ya tlhokomelo ke Khomišinare wa Kgoro ya Kagišo ya Bana gape o beilwe ka fase ga tlhokomelo ya motho yo mongwe yoo e sego motswadi wa gagwe wa nnete. Mohlokomedi le ngwana ba swanetše ba be badudi ba Afrika Borwa.
Mangwalo ao a nyakegago ge go dirwa kgopelo ya dithušo
Pukwana ya boitsebišo yeo e nago le khoutu ya dinomoro tše 13 ya motswadi/mohlokomedi/motlametli
Pukwana ya ngwana ya boitsebišo goba setifikeiti sa matswalo seo se nago le nomoro ya ngwana ya boitsebišo
Bohlatse bja ditseno
Taelo ya kgoro yeo e laetšago maemo a tlhokomelo ya tlametlo
Kalafo/Tshekatsheko yeo e kgonthišišago bogole/go se kgone go itirela
Bohlatse bja go laetša gore ngwana o tsena sekolo ge eba ngwana o mengwageng ya go ka ya sekolong
Ngwana wa tlametlo o swanetše a tšwelele tekong ya ditšhelete
Kapa Bohlabela
Kgoro ya Tšwetšopele ya Leago
Mogala: 040 609 5317
Fekese: 040 636 3175
Kgoro ya Tšwetšopele ya Leago
Mogala: 409 0651
Fekese: 409 0671
Gauteng
Kgoro ya Ditirelo tša Leago le
Tšwetšopele ya Setšhaba
Mogala: 355 7926/ 355 7969
Fekese: 836 4756
Kgoro ya Ditirelo tša Leago le
Tšwetšopele ya Setšhaba
Mogala: 874 3823
Fekese: 874 3710
Kgoro ya Ditirelo tša Leago le
Tšwetšopele ya Setšhaba
Mogala: 013 766 3177
Fekese: 013 766 3455
Leboa Bodikela
Kgoro ya Ditirelo tša Leago, Bokgabo, Setšo le Dithaloko
MMABATHO
Mogala: 387 5123
Fekese: 387 5334
Kapa Leboa
Kgoro ya Ditirelo tša Leago le
Tšwetšopele ya Setšhaba
Mogala: 871 1021
Fekese: 833 4847
Kgoro ya Maphelo le Paballo
Mogala: 290 9084
Fekese: ( 015) 291 3314
